मोर्शी (अमरावती) : मोर्शी पंचायत समितीच्या नूतन प्रशासकीय इमारतीसाठी ग्रामविकास विभागामार्फत निधी मंजूर केल्याबद्दल तालुक्याच्या वतीने पंकजा मुंडे यांचा जाहीर सत्कार करण्यात आला.
या कार्यक्रमासाठी पालकमंत्री प्रविण पोटे पाटील, खासदार रामदास तडस, आमदार डॉ. आशिष देशमुख, आमदार डॉ. अनिल बोडे, जिल्हाध्यक्ष दिनेश सुर्यवंशी यांच्यासह जिल्हा परिषदेचे विषय समितीचे सभापती, पंचायत समितीचे सभापती व पंचक्रोशीतील ग्राम पंचायतींचे सरपंच उपस्थित होते.
राज्याच्या ग्रामीण भागात दर्जेदार व टिकावू रस्ते बांधण्यासाठी मुख्यमंत्री ग्राम सडक योजने अंतर्गत सात हजार सहाशे किलोमीटर रस्त्यांच्या कामांना प्रत्यक्ष सुरुवात झाली आहे. जलयुक्त शिवार अभियान गावागावात राबविण्यात आल्यामुळे विदर्भात विक्रमी तुरीचे पीक आले. बचतगटांची चळवळ गतिमान करण्यासाठी, ‘सुमतीबाई सुकळीकर उद्योगिनी महिला सक्षमीकरण योजने’तून महिला बचतगटांना शून्य टक्के व्याजदराने कर्ज देण्याची योजना सुरू करण्यात आली आहे. बचतगटांची उत्पादने लोकांना ऑनलाईन उपलब्ध व्हावीत यासाठी वेबपोर्टलही सुरू करण्यात आले आहे.
